Al dì de ancòi el sport l’è considerà na roba quasi indispensabile per i fiòi. I nòsi genitori e noni i ne diseva che lori e anca tanti de noi sen cresudi senza sport e sen vegnudi su anca abastanza ben (non tuti purtropo). Da na banda i g’ha anca reson, ma gh’è da dir che quando eren boci noi e soprattutto lori l’era veramente altri tempi; infatti se era sempre en giro per i spiàzi a saltar e zugar e ala fin féven na miriade de sport, quasi a livel de quei che fa i moderni decatlon!
Neven come i mati en bici, senza cambio oviamente e spess anca senza freni; feven corsa e quant che coreven quando i ne becava a robar nós soto le nogare e el paron el ne coreva dreo (altro che Usain Bolt); salto da l’alto (zo dai mureti); rampegada sule piante (sport tipicamente olimpionico); salto dele/nele pozanghere; solevamento pesi per quei fortunadi che gaveva campagna (bisognava cargar le cassete piene de pomi sul bilico del trator); flession (a far for erba nel’ort); tiro ala fune (a tirar legna sula teza cola corda e carucola); diversi atrezi da palestra (la zapa per zapar patate, la forca per girar el fen, la vanga per vangar l’ort …); e tanti altri ancora che se volè me sugerirè voi.
Purtropo adès bòci en giro per i spiazi s’en vede pochi: gh’è men spiazi de na volta, ghe pù asfalto e pù machine che gira, i pù tanti i vive nele zità e sempre de men nei paesoti; gh’è anca pù balordi en giro e se gà paura che i ghe faga del mal ale nósse creature.
I bòci de encòi quando no i è a scola o o a far qualche atività o sport i è seradi en casa a zugar ai videogheim, a vardar la tivù o dreo a altre trapole eletroniche che mi no gh’en capìsso gnent.
De conseguenza me par quasi ovio dir che el sport l’è importante per tanti motivi: pù movimento vol dir en fisico pù san e men temp per magnar porcherie; el sport l’è comunque impegno, fadiga e sacrificio. Tut valori importanti che fortifica el fisico ma anca el carattere e la forza de volontà.
Sport da far al dì de ancoi ghe n’è tantissimi, la roba importante l’è che el ghe piasa ai boci pù che ai genitori. Anca en le ore de ginastica a scòla i gh’en propone e fa provar tanti.
I pù tanti i va a far el calcio e l’è anca ovio visto che ala tivù l’è un dei pochi sport che i sèita a far veder fin a stufarne! Mi son de l’idea che per zugar a calcio basta en balon, en par de amizi e en tòc de spiazal; ma l’è giusto che no i la pensa tuti come mi e chi che g’ha la passion el lo zuga anca seriamente.
I me fiòi i lè ormai arquanti ani che i fa hockey sul giàz; che sport strano che me pareva al’inizio, el pareva anca violento e che i se doves far mal per forza. A mi sule prime me enteresava sol che i emparassa a patinar per po’ nar a divertirne tuti ensèma. Envezi i s’è empasionadi de sto hockey e anca mi ho emparà a conoserlo, aprezarlo e quasi a amarlo.
I boci i è vestidi su che par dei trasformer, sopratut el pù piciol che el fa el portier … fra casco, paracoll, petorina embotida, braghe embotide, conchiglia per proteger i gioiei de famiglia, gambai, gomitiere, guanti particolari, pattini e stecca … el par grant e gross ma quando el se cava for no resta pù gnent: sol 30 chili de bel bocièta!
L’è ovio che tuta sta atrezatura l’ei engombrante e che ghe vol dei borsoni enormi quando se va ale partide e na machina col bagagliaio bel grant.
Gh’è da dir però che quando i se cava casco e guanti i spuza che scamperia anca na puzzola, ma per fortuna aqua e saon ghe n’è ancora e na bela docia la risolve tut. Le pope dell’artistico che le se cambia nel spogliatoio arent le tira su el nas e le dis: “ Ma quanto puzzano questi hockeysti?!?” Oviamente le signorine le parla en talian !
Noi sen stadi fortunadi che a Pèrzen ghàven en bel stadio col giàz artificiale lustro e ben tirà, ghè tante squadre, dai picioi a quei che sui patini par giganti , i è tutti “under” qualcos e mi no capivo, po’, en dì, i mà spiegà còssa ch’el vòl dir: sora de quei pù picioi e soto de quei pù grandi.
I nòssi boci i è en bel gruppo e anca afiatadi, tanti i è deventadi amizi anca for dal giàz;
e anca el grupo dei genitori i vén sempre volintera a vardar le partide, a far el tifo dai spalti, anca se l’è tant fret.
Partide en de sti ani i n’aven vist tante, en poche vinte e anca tante perse, ghaven boci pù bravi e altri abastanza scarsoti ma i serve tuti e ensema i fa ’na squadra che sta cresendo ben e con grinta, no i se perde mai d’animo e la roba pù importante l’è che i se diverte en casin a zugar all’hockey.
Vardo el me portierot, el me picinin, che entant chel dorme forsi el se ‘nsògna l’arivo del Bambinèl, quel che tuti ades i ciama Babbo Natale, o forsi el se vede za en Canada a zugar coi campioni:
beata innocenza, lasantelo sognar.

E alor savè cosa ve digo? Forza Pèrzen !!!
… e Tanti Auguri de Bòn Nadal a tuti !!!

libero adattamento al testo “ L’ok sul giàz” dell’amica Paola Carlin